Исроил 2000 дан ортиқ фаластинлик болани ўғирлаган

2023 йил октябридан буён Исроил ҳарбийлари 2000 дан ортиқ фаластинлик болани ўғирлаб кетган. Ҳуқуқ ҳимоячилари маълумотларига кўра, камида 350 нафар вояга етмаган бола ҳануз гаровда ушлаб турилибди ва улар шафқатсиз муомалага дучор бўлмоқда.

Исроил 2023 йил октябрь ойида Ғазо секторида геноцид бошланганидан буён 2000 дан ортиқ фаластинлик болани ўғирлаб кетган ва гаровда ушлаб турган. Бу ҳақда Фаластин маҳбуслари ишлари бўйича жамият ҳисоботида айтилган.

Ташкилот маълумотларига кўра, камида 350 нафар вояга етмаган бола ҳануз оғир шароитларда Исроил қамоқхоналарида сақланмоқда.

Фақат ўтган туннинг ўзида Исроил ҳарбийлари босиб олинган Ғарбий соҳилнинг Ал-Халил вилоятидаги Саир ва Аш-Шуюх аҳоли пунктларида олти нафар болани ўғирлаб кетган.

Ҳуқуқ ҳимоячилари фаластинлик болаларга нисбатан қўрқитиш, қийноққа солиш, озиқ-овқатдан маҳрум қилиш, яккалаб қўйиш ва тиббий ёрдам кўрсатишни рад этиш ҳолатлари кўпайиб бораётганини маълум қилмоқда.

Айни пайтда Ғазо секторида гаровга олинган вояга етмаганлар сони аниқ эмас. Ташкилот буни мажбурий ғойиб қилиш амалиёти давом этаётгани ва бедарак йўқолган минглаб фаластинликларнинг тақдири ҳақида маълумот йўқлиги билан изоҳламоқда.

Айниқса, Исроил томонидан маъмурий қамоққа олиш амалиёти қўлланилаётгани жиддий хавотир уйғотмоқда. Бу амалиёт одамларни очиқ эълон қилинган айбловсиз ва озодликка чиқаришнинг аниқ муддатисиз қамоқда сақлаш имконини беради.

Ҳуқуқ ҳимоячиларининг баҳолашича, бундай амалиёт болаларни таълимни давом эттириш ва оилалари билан одатий муносабатларни сақлаб қолиш имкониятидан маҳрум қилади.

Ҳисоботда вояга етмаганларнинг Исроил қамоқхоналарида сақланиши оғир оқибатларга олиб келган ҳолатлар ҳам келтирилган.

2025 йил март ойида «Мегиддо» қамоқхонасида фаластинлик ўсмир Валид Холид Аҳмад вафот этган. Тиббий маълумотларда унинг қаттиқ озиб кетгани, тўйиб овқатланмагани ва сувсизланишдан азият чеккани кўрсатилган. Шунга қарамай, унинг ўлими ҳолатлари бўйича тергов тўхтатилган.

Яна бир ҳолат 15 ёшли Муҳаммад Ҳамид билан боғлиқ. У «Офер» қамоқхонасида сақланаётган вақтида қўтир касаллигини юқтириб олган. Унинг аҳволи ёмонлашиб, инфекция ҳаётий муҳим аъзоларини ҳам зарарлаган.

Ўсмирнинг юрагида жарроҳлик амалиётлари ўтказилган, у оғир аҳволда жонлантириш бўлимида ётган. Кейинчалик унинг оёғи ампутация қилинган.

Ташкилот маълумотларига кўра, Исроил ҳукумати Ҳамиднинг соғлиғи кескин ёмонлашганидан кейин уни озод қилган. Ўсмир қарийб уч ойдан бери даволанишни давом эттирмоқда.

Ҳуқуқ ҳимоячилари унинг озод этилишини Исроил ҳокимиятининг тиббий ёрдам кўрсатиш учун жавобгарликдан қочишга уриниши сифатида баҳолаган.

Фаластин маҳбуслари ишлари бўйича жамият халқаро ҳамжамиятни ноқонуний равишда ушлаб турилган болаларни озод қилиш, маъмурий қамоққа олиш, қийноққа солиш, мажбурий сўроқ қилиш ва тиббий ёрдам кўрсатишни рад этиш ҳолатларига чек қўйишга эришишга чақирди.

Ташкилот таъкидлашича, халқаро муносабатлар қоидабузарликларни қайд этиш ва қораловчи баёнотлар билан чекланиб қолмаслиги керак. Фаластинлик болаларнинг ҳаёти ва ҳуқуқларини ҳимоя қилиш, шунингдек, айбдорларни жавобгарликка тортиш учун аниқ чоралар кўриш зарур.