Indoneziyada 11 kishi bo‘lgan samolyot radarlardan yo‘qoldi

Indonesia Air Transport aviakompaniyasiga tegishli ATR rusumli samolyot Janubiy Sulavesi provinsiyasining Maros okrugi hududida radarlardan yo‘qoldi.

Report xabariga ko‘ra, bu haqda mahalliy Detik portali ma’lum qilgan. Samolyotda jami 11 kishi — sakkiz nafar ekipaj a’zosi va uch nafar yo‘lovchi bo‘lgan. U Jokyakarta–Makassar yo‘nalishi bo‘yicha parvoz qilgan.

Qidiruv-qutqaruv xizmati vakillarining ma’lum qilishicha, samolyot bilan aloqa uzilgan va uning joylashuvi hozircha noma’lum. Harbiylar samolyot halokatga uchragan bo‘lishi ehtimolini istisno qilmayapti.

Hozirda yong‘in izlari aniqlangan o‘rmon hududida qidiruv-qutqaruv ishlari davom etmoqda.