"Hizbulloh" bir oy ichida Isrolinning 48 ta tankini ishdan chiqardi

Livanning "Hizbulloh" harakati 16 apreldan 17 maygacha Isroil kuchlariga qarshi 339 ta operasiya o‘tkazganini xabar qildi.

Bu haqda harakat ushbu bayonotni o‘zining Telegram-kanalida e’lon qildi.

"Hizbulloh"ning so‘zlariga ko‘ra, hujumlar "sulh bitimini buzishga javoban" amalga oshirilgan. Harakatning ta’kidlashicha, bu davrda 15 ta qo‘mondonlik punkti, uchta kazarma, ikkita harbiy baza, yettita artilleriya pozisiyasi va bitta vertolyot maydonchasiga zarba berilgan.

"Hizbulloh" shuningdek, 48 ta tank, 18 ta zirhli transportyor va 12 ta SUVni to‘liq yoki qisman ishdan chiqarganini da’vo qilmoqda. Harakatning ma’lumotlariga ko‘ra, transport vositalari boshqariladigan raketalar va xudkush dronlar tomonidan urib tushirilgan.

Bayonotda Isroil qurbonlari haqida aniq ma’lumotlar keltirilmagan. Biroq, "Hizbulloh" halok bo‘lgan va yaralangan Isroil askarlarining umumiy sonini taxminan 250 kishi deb baholamoqda.