Gruziya Rossiya sababli YEI bosimiga qarshi

Gruziya Yevropa Ittifoqi bilan do‘stona va sheriklik munosabatlarini saqlab qolishni istaydi, biroq Rossiyaga qarshi sanksiyalarga qo‘shilmagani uchun bosim o‘tkazilishini qabul qilmaydi. Bu haqda «Gruzin orzusi — Demokratik Gruziya» partiyasi bosh kotibi, Tbilisi meri Kaxa Kaladze ma’lum qildi.

Uning so‘zlariga ko‘ra, Gruziya va Yevropa Ittifoqi o‘rtasidagi munosabatlar tenglik va o‘zaro hurmat tamoyillariga asoslanishi kerak. Kaladze Tbilisi YEI bilan faqat do‘stona va sheriklik munosabatlarini rivojlantirishdan manfaatdor ekanini ta’kidladi.

Gruziya va YEI o‘rtasidagi munosabatlar 2023–2024 yillarda gruzin hukumati siyosati yuzasidan yuzaga kelgan kelishmovchiliklar fonida sezilarli darajada yomonlashgan. 2024 yil noyabr oyida Bosh vazir Irakliy Kobaxidze mamlakatning YEIga qo‘shilish bo‘yicha muzokaralarini 2028 yil oxiriga qadar to‘xtatishini ma’lum qilgan.