Farg‘onada yoshlar innovasiya markazi tashkil etilmoqda

Farg‘ona vodiysidagi oliy ta’lim muassasalari hamkorligida “Yoshlar innovasiya markazi” tashkil etilmoqda. Innovasion rivojlanish vazirligi tashabbusi bilan ochilayotgan markaz iqtidorli yoshlarni o‘z innovasion g‘oyalarini amalga oshirish, ilmiy-tadqiqot va innovasiya faoliyatini rivojlantirishga zamin bo‘ladi. Zero, innovasion texnologiyalarga qiziqishi baland bo‘lgan yoshlarni kashf etish va ularning yangi raqobatbardosh ilmiy va amaliy ishlanmalarini hayotga tatbiq etishga safarbar etish juda muhim. Shu bois zamon talablariga javob beradigan, mehnat bozorida raqobatbardosh kadrlar tayyorlash uchun shart-sharoitlar va imkoniyatlar yaratilmoqdaki, buning natijasida talaba yoshlar, yosh olim va professor-o‘qituvchilarni fan va texnologiyalarning zamonaviy yutuqlari bilan tizimli tanishtirish imkoni paydo bo‘ladi. 

 

Markaz yordamida mahalliy mahsulotlarni ichki va jahon bozorlariga yo‘naltirish imkonini beruvchi innovasion mexanizmlar ishlab chiqiladi va yoshlarni ilmiy-tadqiqot ishlariga jalb etiladi. 

Ishlab chiqilgan dasturiy mahsulotlarga mualliflik guvohnomalarini rasmiylashtirish, ommalashtirish va tijoratlashtirish jarayonlarida ko‘maklashish hamda mahalliy va xorijiy mutaxassislar ishtirokida onlayn ilmiy muloqotlar, mahorat darslari, seminar-treninglar va malaka oshirish kurslarini o‘tkazish, dolzarb mavzularda ilmiy-texnik yo‘nalishdagi tanlovlar tashkil etish kabilar ham nazarda tutilgan.

 

Muhimi esa yoshlar mana shunday innovasion markaz ochilishiga o‘zlari bosh-qosh. Markazning faoliyatini qanday bo‘lishi-yu, nima ishlar qilishi lozimligini rejalashtirib qo‘yish barobarida uning binosi va atrofdagi hududning bo‘lajak ko‘rinishini loyihalab, suratlarga tushirib qo‘yishgan. Ularning faolligi, g‘ayrat va shijoatini kuzatgan Innovasiya vazirligi mas’ullari farg‘onalik yoshlarga ishonch bilan markaz faoliyati uchun zarur qonun hujjatlarini tayyorlashmoqda.