Dunyo yuzini ko‘rmagan asarlar

Fazilatli shayx hazratlarining dunyodan o‘tganlariga qariyb 4 yil bo‘libdi-ki u kishining yozgan kitoblari hanuz nashrdan chiqishda davom etmoqda, kitobxonlarimizga yetib bormoqda. Eng hayratlanarlisi, hali shayximizning chop etilmagan bir talay asarlari ham bor. Bu haqda shayx Muhammad Sodiq Muhammad Yusuf hazratlarining o‘g‘illari Ismoil Muhammad Sodiq shunday deydilar:

«Hazrat vafot etganlaridan so‘ng, u kishining qalamlariga mansub nashrga tayyorlanayotgan 15 ta asar mavjud. Bu asarlar hali dunyo yuzini ko‘rganicha yo‘q. Shayx hazratlari bu kitoblarni o‘zlari shogirdlari bilan birgalikda dars qilib o‘tganlar. Dars o‘tish jarayonida kitoblar tarjimasi ham qilib borilgan. Misol uchun yaqinda nashrdan chiqqan kitob «Olam va odam, din va ilm» asarlari kitobxonlarimizga taqdim etildi. Ushbu kitobni shayx hazratlari hayotlik chog‘larida 2014 yil 4 iyul juma kuni ertalab soat 9:50 da yozib tugatgan ekanlar. Hozir hisoblab ko‘rsak, 5 yil-u ikki oydan ziyod vaqt mobaynida shu kitob dunyo yuzini ko‘ribdi. Bugungi kunda qolgan kitoblar ham nashrga tayyorlanmoqda».

Alloh taolo Qur’oni karimda shunday marhamat qiladi:

«Robbim, ilmimni ziyoda qil!» (Toha surasi, 114-oyat).

Allohni tanigan bandaga shu duoning o‘zi kifoya qiladi. Alloh taolo Qur’oni karimda Rasululloh sollallohu alayhi vasallamga birgina narsani ziyoda etishni so‘rab duo qilishni buyurgan. U ham bo‘lsa, yuqoridagi oyat — ilmdir.

Aziz kitobxon, quyida fazilatli shayx Muhammad Sodiq Muhammad Yusuf rahmatullohi alayhning hali dunyo yuzini ko‘rmagan, nashrga tayyorlanayotgan kitoblarining jadval ko‘rinishidagi ma’lumotini sizlarga taqdim qilamiz.

Alloh taolo barchamizni ilmga muhabbatli va amalda tatbiq etuvchi solih bandalaridan qilsin!

Manba: islom.uz