Chaddagi aviabazada Xitoyning CH-4 dronlari ko‘rinish berdi

Sharqiy Chadning Sudan chegarasi yaqinidagi Abeche aviabazasida Xitoyning kamida to‘rtta CH-4 qurolli droni vizual ravishda tasdiqlangan. Abechening joylashuvi uni Darfur chegarasi bo‘ylab operasiyalar o‘tkazish uchun juda qulay qiladi. SIPRIning 2021–2025 yillar ma’lumotiga ko‘ra, Xitoy qurol eksportining 13 foizi Afrika davlatlariga to‘g‘ri kelgan. Shu davrda Xitoy qurol eksporti bo‘yicha dunyodagi asosiy yetkazib beruvchilardan biri bo‘lib qolgan. Nega Afrika davlatlari Xitoy qurolini oladi? Asosiy sabablardan biri — narx. Xitoy qurollari ko‘p hollarda AQSh yoki Yevropa analoglaridan arzonroq. Bundan tashqari, Pekin kredit, imtiyozli moliyalashtirish va texnik xizmat ko‘rsatishni ham taklif qilishi mumkin. Xitoy Afrikada shunchaki «qurol sotuvchi» bo‘lib qolmayapti. U qurol + kredit + texnologiya + mahalliy ishlab chiqarish + texnik xizmatdan iborat uzoq muddatli harbiy hamkorlik tizimini yaratyapti. Bu esa Pekinning Afrikadagi iqtisodiy ta’sirini harbiy-strategik ta’sir bilan ham to‘ldiryapti.