Bugun Alepponing sharqiy hududlarida gumanitar yo‘lak ochiladi

Suriyaning shimolida joylashgan Aleppo viloyatining sharqiy hududlaridan gumanitar yo‘lak 15 yanvar kuni ochiladi.

Bu haqda arab respublikasi o‘tish davri hukumati qurolli kuchlari tezkor qo‘mondonligi SANA agentligiga ma’lum qilgan.

Bayonotga ko‘ra, xavfsiz yo‘nalish Aleppo shahriga olib boradigan asosiy trassa orqali o‘tadi. U Yevfrat daryosi bo‘yida joylashgan, kurd tuzilmalari tayanch punkti hisoblangan Deyr-Xafer aholi punktini Suriyaning shimoliy poytaxti Aleppo bilan Hamíma aholi punkti orqali bog‘laydi. Suriya armiyasi fuqarolarni Aleppo sharqida joylashgan “Suriya demokratik kuchlari” (SDK) koalisiyasi pozisiyalariga yaqinlashmaslikka chaqirdi.

Seshanba kuni tezkor qo‘mondonlik shaharning sharqida joylashgan hududlarni yopiq harbiy zona deb e’lon qildi. Jangarilar bilan to‘qnashuv chizig‘iga qo‘shimcha harbiy kuchlar va bronetexnika yuborildi.

Damashqdagi hokimiyatlar SDKni yanvar oyi boshida Aleppo mahallalariga, suriyalik harbiylar va ichki xavfsizlik kuchlari postlariga zarba bergan uchuvchisiz uchish apparatlarini uchirish uchun shaharning sharqiy atroflaridan foydalanganlikda aybladi.

SDK esa bu ayblovlarni rad etib, Yevfrat bo‘yidagi plasdarm mamlakatning shimoliy-sharqida o‘z nazoratidagi hududlarni himoya qilish maqsadida yaratilganini ta’kidladi.