O‘zbekistonda xizmat ko‘rsatgan artist Alisher Fayz «13-studiya» loyihasining navbatdagi mehmoni bo‘ldi. Samimiy va ochiq ruhda kechgan suhbat davomida xonanda o‘zining bolalik yillari, erta ulg‘ayish azoblari va musofirchilikdagi ilk qadamlari haqida to‘xtalib o‘tdi.
Ma’lum bo‘lishicha, san’atkor bor-yo‘g‘i 10 yoshida poytaxt Toshkentga kelib, tengdoshlaridan ancha erta mustaqil hayotga qadam qo‘ygan. Boshlovchining o‘sha og‘ir damlarda nimani ko‘proq sog‘ingani haqidagi savoliga xonandaning javobi studiyadagilarni biroz sukutga toldirdi.
— Bola bo‘lishni sog‘indim, — dedi Alisher Fayz biroz ho‘rsinib. — Hayot shunday ekan, vaziyat meni tezroq katta bo‘lishga majbur qilgan. O‘sha paytlarda bolalik gashtini surishdan ko‘ra, o‘z yo‘lini topish va mustaqil bo‘lish muhimroq edi.
Bu qisqa, ammo mazmunli javob san’atkorning bosib o‘tgan yo‘li naqadar mashaqqatli bo‘lganidan dalolat beradi.
Xonandaning ushbu samimiy iqrori ijtimoiy tarmoqlarda katta muhokamalarga sabab bo‘ldi. Muxlislar Alisher Fayzni qo‘llab-quvvatlab, uning bugungi muvaffaqiyatlari zamirida aynan o‘sha «erta ulg‘aygan bola»ning mehnati va sabri yotganini ta’kidlashmoqda.
Ha, hayot sinovlari kimnidir sindirsa, kimnidir toblaydi. Alisher Fayz esa bu sinovlardan o‘tib, xalq suygan san’atkor darajasiga ko‘tarilgani tahsinga loyiq.
Husanovning finaldagi o‘yini qanday baholandi?
Eron Trampning Hormuz bo‘g‘ozini ochish haqidagi ultimatumiga javob berdi
Trampning onasi o‘g‘li haqida: "U aqlsiz..."
