Belarusda dronlarga qarshi yangi lazer tizimi yaratildi

Lukashenko yangi tizim 2 km gacha masofadagi dronlarni yo‘q qila olishini aytdi.

Prezident Aleksandr Lukashenko Belarusda uchuvchisiz qurilmalarga qarshi kurashish uchun lazer kompleksi ishlab chiqilganini ma’lum qildi.

Uning so‘zlariga ko‘ra, tizim dronlarni 1,5–2 kilometr masofagacha yo‘q qila oladi.
“Biznikilar qandaydir lazer ixtiro qilishdi… Ancha samarali, mudofaa vaziri aytishicha, u 1,5–2 kilometr masofada uchuvchisiz qurilmani kuydirib yuboradi”, — dedi Lukashenko.

U, shuningdek, dronlarga qarshi kurash barcha davlatlar uchun dolzarb vazifa bo‘lib qolayotganini, shu bilan birga hech bir tizim yuz foizlik himoyani ta’minlay olmasligini ta’kidladi.

Lukashenko zamonaviy dronlar radioelektron kurash vositalarini aylanib o‘tishi mumkinligini, bu esa ularni aniqlash va tutib qolishni murakkablashtirishini ham qayd etdi.

Avvalroq Belarusda sinovdan o‘tkazilgan “Shafran” nomli lazer kompleksi ishlab chiqilgani haqida xabar berilgandi.