Armaniston Rossiyadan Gyumridagi harbiy bazani olib chiqishni so‘ramagan

Moskvaga Yerevandan Rossiyaning Gyumridagi harbiy bazasini olib chiqish haqida murojaat kelib tushmagan. Rossiya hali ham mazkur bazani Armaniston va Janubiy Kavkaz xavfsizligining muhim elementi deb hisoblaydi. Bu haqda Rossiya tashqi ishlar vaziri o‘rinbosari Mixail Galuzin «Izvestiya» nashriga ma’lum qildi.

Uning so‘zlariga ko‘ra, Rossiyaning Armaniston hududidagi harbiy huzuri masalasi mamlakat ichida faol muhokama qilinmoqda. Biroq Moskva hozircha unga amaliy muqobil variantni ko‘rmayapti.

«Ko‘pchilik mutlaqo asosli ravishda: muqobil variant qanday bo‘ladi, degan savolni bermoqda. Bugungi kunda, bizningcha, bunday muqobil ko‘rinmayapti. Ochig‘ini aytganda, masalan, fransuz harbiylarini bu o‘rinda tasavvur qilish qiyin. Hech bo‘lmaganda, Fransiyaning Armanistondan geografik jihatdan uzoqligi sababli», — dedi Galuzin.

Uning qo‘shimcha qilishicha, Rossiya mudofaa va xavfsizlik sohasida Armaniston bilan hamkorlikni davom ettirish masalasini muhokama qilishga tayyor.

Avvalroq muxolifatdagi «Armaniston» bloki deputati Ishxan Sagatelyan Nikol Pashinyan hukumati Gyumridagi Rossiya harbiy bazasini chiqarishga harakat qilishi, uning o‘rniga esa boshqa xorijiy harbiy kuchlarni jalb qilishi mumkinligini aytgan edi.

Bunga Rossiya prezidenti Vladimir Putinning bayonoti sabab bo‘lgan. SHHT sammiti doirasida Putin, agar Armaniston o‘z hududida Rossiya harbiylarini ko‘rishni istamasa, Moskva ularni «hatto ertagayoq» olib chiqishga tayyorligini aytgan.