Arktika Xitoyning Yevropaga chiqish darvozasiga aylanmoqda

Xitoyning Sea Legend kemachilik kompaniyasi Arktika orqali Shimoliy dengiz yo‘li bo‘ylab Xitoy va Yevropa o‘rtasida muntazam konteyner tashuvlarini yo‘lga qo‘ydi. Yo‘nalish Ninbo-Chjoushan portini Buyuk Britaniyadagi Felikstou porti bilan bog‘laydi va yuklarni taxminan 20 kunda yetkazib berish imkonini beradi. Bu Sues kanali orqali o‘tadigan an’anaviy yo‘nalishga qaraganda qariyb ikki baravar tez.

Ushbu yo‘nalish 2025 yildagi sinov reysining davomi bo‘ldi. O‘shanda Sea Legend konteyner tashuvchi kemasi Xitoydan Buyuk Britaniyaga Arktika orqali birinchi marta 20 kunda yetib borgan edi. 2026 yilda kompaniya yozgi navigasiya mavsumi davomida sakkizta reysni amalga oshirishni rejalashtirmoqda.

Shu bilan birga, Shimoliy dengiz yo‘li va Arktika hozircha an’anaviy savdo yo‘nalishlarining to‘liq muqobiliga aylana olmaydi. Kema qatnovi muzliklar holati va ob-havoga bog‘liq, kemalar maxsus tayyorgarlikni talab qiladi, Arktikada qutqaruv ishlarini amalga oshirish uchun zarur infratuzilma esa hali cheklangan.

Bundan tashqari, sug‘urta xarajatlarining yuqoriligi va yo‘nalishning Rossiya qirg‘oqlari bo‘ylab o‘tishi bilan bog‘liq geosiyosiy xatarlar ham qo‘shimcha to‘siq bo‘lmoqda.