AQShning Venesueladagi qisqa muddatli maqsadi nima?

AQShning Venesueladagi qisqa muddatli maqsadi Xitoy, Rossiya, Eron va Kuba kabi raqiblariga neft yetkazib berishni to‘xtatish — CNN.

Rejalardan xabardor bo‘lgan ikki manba CNN'ga Tramp ma’muriyati Venesueladagi neft va energetika ob’ektlarini himoyalash uchun AQSh qo‘shinlarini yuborish o‘rniga xususiy harbiy pudratchilarni jalb etishga tayyorgarlik ko‘rayotgani, bu esa mintaqada tajribaga ega va ma’muriyat bilan aloqalari bo‘lgan xavfsizlik kompaniyalari uchun katta moliyaviy imkoniyatlar yaratishi mumkinligini ma’lum qilgan.

Ushbu ob’ektlarni qanday himoyalash masalasi bo‘yicha muhokamalar hali dastlabki bosqichda. Shunga qaramay, vaziyatdan xabardor shaxsning bildirishicha, bir qator xususiy xavfsizlik kompaniyalari allaqachon Venesueladagi AQSh ishtiroki rejasiga qo‘shilish uchun raqobatni boshlab yuborgan.

CNN'ning xabar berishicha, Venesueladagi qisqa muddatli maqsad biroz boshqacha ko‘rinmoqda. Tramp omma oldida AQSh Venesueladagi neftga “egalik qilishini” aytgan bo‘lsa-da, bir nechta manbalar asl niyat Rossiya, Xitoy, Eron va Kuba kabi AQSh raqiblariga neft oqimini to‘sish ekanini bildirgan.

Manbalarga ko‘ra, rejaning bir qismi hozirda Venesuelada saqlanayotgan neftning mamlakat hududida qolishini ta’minlashni nazarda tutadi. Agar siyosiy o‘tish davri sharoitida amerikalik kompaniyalar Venesuelaga qaytasa, aynan shu vazifa xususiy pudratchilar zimmasiga yuklanadigan xavfsizlik missiyasining bir qismi bo‘lishi mumkin.