AQShning Mustaqillik kuni olti kishining o‘limiga sabab bo‘ldi

AQShning turli shaharlarida Mustaqillik kunini nishonlash paytida sodir bo‘lgan otishmalarda kamida olti kishi halok bo‘ldi va o‘nlab odamlar jarohat oldi.

Bu haqda NBC news xabar berdi.

Nyu-Yorkning Bruklin shahridagi Koni oroli mahallasida qora chang‘i niqobi kiygan erkak shanba kuni kechqurun oilaviy barbekyuda qatnashayotgan odamlarga qarata o‘t ochdi va natijada kamida sakkiz kishi, jumladan, to‘rt bola yaralandi.

Shunga o‘xshash hodisalar Indiana, Kaliforniya, Missuri va Ogayo shtatlarida ham qayd etildi. Halok bo‘lganlar orasida bolalar va o‘smirlar ham bor edi. Floridada Pensasola markazida sodir bo‘lgan otishmada 19 yoshli yigit halok bo‘ldi va yana olti kishi yaralandi. Indianada bir nechta otishmalar natijasida bir ayol va 10 yoshli bola halok bo‘ldi, sakkiz nafar kattalar yaralandi.

Shuningdek, Missurida 17 yoshli yigit otishmada halok bo‘ldi va yana ikki 16 yoshli yigit o‘q jarohatlari bilan kasalxonaga yotqizildi.