AQSh startapi derazasiz yo‘lovchi samolyoti loyihasini taqdim etdi

AQShning JetZero startapi tashqi ko‘rinishi skat balig‘ini eslatuvchi Z4 nomli noodatiy yo‘lovchi samolyotini yaratishni rejalashtirmoqda. Unda odatiy fyuzelyaj va unga biriktirilgan qanotlar o‘rniga korpus hamda qanotlar bir-biriga uyg‘unlashgan yaxlit keng konstruksiyadan foydalaniladi. Bu texnologiya Blended Wing Body deb ataladi.

Ishlab chiquvchilarning rejasiga ko‘ra, samolyot taxminan 250 nafar yo‘lovchini 9 300 kilometrgacha masofaga tashishi mumkin. Shuningdek, u o‘lchamlari o‘xshash bo‘lgan an’anaviy samolyotlarga nisbatan 50 foizgacha kam yoqilg‘i sarflashi kutilmoqda. Havo qarshiligini kamaytirish uchun dvigatellarni samolyotning orqa qismiga joylashtirish rejalashtirilgan. Biroq bu ko‘rsatkichlar hozircha loyihaning maqsadlari bo‘lib, amaliyotda tasdiqlanmagan.

Samolyotning g‘ayrioddiy shakli salonni kengaytirish, yo‘lovchilar uchun bir nechta alohida hududlar tashkil etish, qulayroq o‘rindiqlar va qo‘l yuki uchun qo‘shimcha joy ajratish imkonini beradi.

Biroq loyihada muhim muammo ham bor: ko‘plab yo‘lovchilar tashqi devorlardan uzoqda joylashishi mumkin. Shu sababli an’anaviy illyuminatorlardan voz kechishga to‘g‘ri kelishi ehtimoldan xoli emas. Muqobil yechimlar sifatida shiftga o‘rnatiladigan derazalar yoki samolyot tashqarisidagi manzarani aks ettiruvchi raqamli ekranlar ko‘rib chiqilmoqda. Salonning yakuniy dizayni hozircha belgilanmagan.

JetZero kompaniyasi to‘liq o‘lchamli namoyish samolyotining ilk parvozini 2027 yilda amalga oshirishni rejalashtirmoqda. Z4 samolyotida tijoriy parvozlarni esa 2030-yillarning boshlarida boshlash ko‘zda tutilgan.

Ungacha loyiha jiddiy sinovlardan o‘tishi va zarur ruxsatnomalarni olishi kerak.