Andijondagi maktabda yong‘in sodir bo‘ldi

Bugun, 20 avgust kuni Shahrixon tumanidagi maktab binosida yong‘in sodir bo‘layotgani haqida xabarlar tarqaldi. Andijon viloyati hokimligi matbuot xizmati bu haqda ma’lumot berdi.

Ushbu yong‘in soat 15:28 da “Shahrixonlik” MFY, “Hamza” ko‘chasida joylashgan tuman MMTBga qarashli 2-umumiy o‘rta ta’lim maktabida sodir bo‘lib, qo‘shimcha (ko‘mirxona) binoning 30 kv/m maydoni tom qismi, shu ko‘chada joylashgan ATB “Hamkorbank” tuman filiali qo‘shimcha binosining 30 kv/m tom qismi hamda noturar binoning 5 kv/m tom qismi yong‘indan zararlangani kuzatilgan.

FVB o‘t o‘chirish guruhi soat 15:32 da (4 daqiqa ichida) mazkur joyga yetib borib, 15:36 da yong‘inni o‘rab olgan. Soat 16:14 da esa, yong‘in butkul o‘chirilgan. Hodisa oqibatida tan jarohati olganlar yoki qurbon bo‘lganlar yo‘q.

Binolarning umumiy 500 kv/m maydoni yong‘indan saqlab qolindi. Yong‘inni kelib chiqish sabablari va zararlar aniqlanmoqda.