Зеленскийнинг Уитткофф билан Берлиндаги музокаралари бугун давом эттирилади

Украина ва Америка делегацияларининг Берлиндаги тинчлик музокаралари 15 декабрда давом этади, таклифлар тафсилотлари ҳозирча ошкор этилмаяпти.

Бу ҳақда Германиянинг Handelsblatt газетаси хабар бермоқда.

Украина делегациясига Президент Владимир Зеленский, Америка делегациясига эса Президент Дональд Трампнинг махсус вакили Стив Уиткофф бошчилик қилмоқда.

АҚШ ҳукумати, газетанинг ёзишича, Берлиндаги музокараларда “муваффақиятга эришиш истиқболларини олдиндан тан олди”, Трампнинг Германияга делегация юборгани шундан далолат беради.

Айни пайтда Москва музокараларга шубҳа билан қарамоқда. Россия президенти Владимир Путиннинг ташқи сиёсат бўйича маслаҳатчиси Юрий Ушаков йиғилишдан олдин европаликлар ва Украинанинг тинчлик режасига қўшган ҳиссаси “конструктив бўлиши даргумон” эканини айтди.