Зеленский Европа Иттифоқи етакчилари саммитида иштирок этади

Украина президенти Владимир Зеленский пайшанба куни Брюсселда бўлиб ўтадиган Европа Иттифоқи етакчилари саммитида иштирок этади.

Бу ҳақда Bloomberg агентлиги хабар бермоқда.

Агентликнинг қайд этишича, Европа Иттифоқи етакчилари бир неча ҳафтадан бери Киевнинг молиявий захиралари тезда тугаб бораётганини ҳисобга олиб, Украинага кредит бериш шартлари бўйича келишиб олишга уринмоқда. Бироқ, музокаралар Россия Марказий банкининг музлатилган активларининг аксарияти жойлашган Бельгия томонидан жиддий қаршиликка дуч келмоқда.

Бельгия агар Москва жавоб чораларини кўрса ёки ўз активларини суд орқали қайтариб олса, потенциал молиявий жавобгарликдан ҳимоя қилинишини талаб қилмоқда.

Аввалроқ, Европа Кенгаши президенти Антониу Кошта Зеленскийни 18 январь куни бўлиб ўтадиган Европа кенгаши йиғилишида иштирок этишга таклиф қилган эди. Бироқ, Украина ОАВларига кўра, Украина президенти тадбирда шахсан қатнашиши даргумон ва масофадан туриб иштирок этади.