Япония ҳукумати келгуси беш йил ичида мамлакат мудофаа қобилиятини ошириш учун 40 триллион иенадан (290 миллиард доллардан ортиқ) ортиқ маблағ сарфлашни режалаштирмоқда. Бу ҳақда якшанба куни Yomiuri газетаси хабар берди.
Унинг сўзларига кўра, ҳозирда тегишли режа кўриб чиқилмоқда. Япония ҳукумати ҳар йили ялпи ички маҳсулотнинг 2 фоизидан кўпроғини мудофаага сарфлашни режалаштирмоқда.
Япония Мудофаа вазирлиги 2023-молия йили учун 5,59 триллион иенадан (тахминан 40 миллиард доллар) ортиқ бюджет сўрашни режалаштирмоқда. Бу маблағлар, хусусан, узоқ масофага учувчи ракеталар, ҳужумчи учувчисиз самолётлар ва гипертовушли тизимларни тутиб олишга қодир бўлган янги ракетага қарши мудофаа тизимларини яратиш ва оммавий ишлаб чиқаришга йўналтирилиши кўзда тутилган.
Япония сўнгги бир неча йил ичида мудофаа харажатларини мунтазам ошириб борди – жорий молиявий йилда (2022 йил апрелда бошланган) ушбу мақсадлар учун ажратмалар 5,37 триллион иенага (39,1 миллиард доллар) етди, бу рекорд даражадаги юқори кўрсаткич эди.