Япония АҚШга SM-6 ракеталарини биргаликда ишлаб чиқаришни таклиф қилмоқда

Япония АҚШга SM-6 зенит-ракеталарини биргаликда ишлаб чиқариш имкониятини кўриб чиқишни таклиф қилди.

Бу ҳақда Япония мудофаа вазири Гэн Накатани Токиода Пентагон раҳбари Пит Хегсет билан музокаралар якунлари бўйича ўтказилган матбуот анжуманида маълум қилди.

"Биз AMRAAM ҳаво-ҳаво ракеталарини биргаликда ишлаб чиқариш имкониятлари бўйича маслаҳатлашувларни фаоллаштиришга келишиб олдик. Шунингдек, SM-6 ракеталарини биргаликда ишлаб чиқариш имкониятини кўриб чиқишни таклиф қилдим", - деди Накатани. У икки мамлакат мудофаа соҳалари, хусусан, ракета ишлаб чиқариш соҳасидаги ҳамкорлик ниҳоятда муҳим эканига ишонч билдирди.

Бу Хегсет Пентагон раҳбари этиб тайинланганидан кейин икки давлат мудофаа вазирликлари раҳбарларининг биринчи юзма-юз музокаралари эди. Шанба куни икки вазир, шунингдек, Япония Бош вазири Сигэру Исиба Тинч океанидаги Иво Жима оролида, Иккинчи жаҳон уруши даврида япон ва америкалик кучлар ўртасидаги энг йирик жанглардан бири бўлган қўшма ёдгорлик маросимида иштирок этди.