Яна бир президент қамоқ жазосига ҳукм қилинди

Аргентинанинг собиқ президенти Кристина Киршнер коррупция жинояти бўйича олти йил қамоқ жазосига ҳукм қилинди.

Бу ҳақда TN телеканали хабар бермоқда.

Телеканал хабарига кўра, Аргентина Олий суди илгари чиқарилган ҳукмни ўз кучида қолдирган. Суд коллегияси бир овоздан Киршнерни жиноий гуруҳ ташкил этишда ва давлат маблағларини ўзлаштириш мақсадида фирибгарлик асосидаги бошқарувда айбдор деб топган. Ушбу маблағлар Санта-Крусдаги миллий инфратузилма лойиҳалари учун ажратилган эди.

Суд шунингдек, Киршнер 2003 йилдан 2015 йилгача тадбиркор Лазаро Баэс манфаатларини кўзлаб иш олиб борганини аниқлаган. Лойиҳалар бўйича нархлар сунъий равишда оширилган ва кўплаб ишлар умуман бажарилмаган. Шунингдек, унга умрбод давлат хизматида ишлаш тақиқланган.

Қайд этилишича, судланувчи қамоқ жазосини уй қамоғига алмаштиришни сўраш ҳуқуқига эга.