Дам олиш кунлари Хива шаҳри янада гавжум. “Арда Хива” мажмуасида бўлиб ўтаётган “Гиламлар жилоси” халқаро кўргазмаси узоқ-яқиндан келган меҳмонлар кўзини қувонтирмоқда.
Хоразмда илк бор ўтказилаётган ушбу тадбирда хориждан ва мамлакатимизнинг турли ҳудудларидан келган гиламдўзлар, ҳунармандлар ўз маҳсулотлари билан қатнашмоқда. Шунингдек, кўргазмада эрон, афғон, озарбайжон, қирғиз, қозоқ, туркман гиламлари ҳам жой олган.
Тадбир доирасида “Ўзбекистон гиламдўзлиги: анъана ва инновация” мавзусида халқаро илмий-амалий конференция ташкил қилинди. Моҳир гиламдўзлар иштирокида маҳорат дарслари ўтказилди.
Тадбирларнинг иккинчи кунида “Ичан қалъа”даги “Ипакчилик музейи” ва моҳир гиламдўзлар устахоналари билан танишиш белгиланган.
Хоразм халфачилиги ва этно-дизайнерларнинг либослар намойиши уйғунлашган концерт дастури, халқ сайли, кураш мусобақаси, дорбозлар, қўғирчоқбозлик ва ҳунармандлик буюмлари намойишлари тадбир шукуҳини оширмоқда.
Анжуманда таъкидланганидек, гиламлар халқимизнинг асрлар оша авлоддан-авлодга ўтиб келаётган моддий-маънавий бойлиги. Уларда халқимизнинг тарихий хотираси, оламни идрок этиш фалсафаси ва маданий ҳаёти мужассам. Мақсад ана шу юксак меросни асраб-авайлаш, ривожлантириш ва дунё миқёсида тарғиб этишдир.
Муҳаббат Тўрабоева, ishonch.uz
