Винисиус келажаги бўйича якуний қарорини айтди

Журналист Мигель Серрано маълумотига кўра, “Қироллик клуби” бразилиялик футболчиси Винисиус Жуниорнинг 2027 йил ёзида жамоадан эркин агент сифатида кетиб қолишидан хавотир олмаяпти.

Ҳужумчининг ўзи “Реал” президенти Флорентино Пересга бундай қилмасликка шахсан ваъда берган.

Винисиус “Реал”да узоқ йиллар қолиш ниятида эканини билдирган. Ҳатто шартномани узайтириш бўйича келишувга эришилмаган тақдирда ҳам, у фақат “Реал” учун манфаатли бўлган сумма эвазига кетиши мумкинлигини таъкидлаган.

Винисиус Жуниор 2018 йилда “Фламенго”дан “Реал”га 45 миллион евро эвазига ўтган эди. Унинг клуб билан шартномаси 2027 йил 30 июнгача амал қилади. Томонлар анчадан бери янги битим бўйича келиша олмаяпти.

Жорий мавсумда ҳужумчи Мадрид клуби сафида барча мусобақаларда 53 та ўйинда майдонга тушиб, 22 та гол ва 14 та голли узатма муаллифи бўлди.