Виктор Орбан депутатлик мандатидан воз кечди

Венгрия бош вазири Виктор Орбан “Фидес” партияси етакчиси сифатида олган депутатлик мандатини топширишини маълум қилди.

Орбаннинг партияси 12 апрель куни бўлиб ўтган парламент сайловларида мағлуб бўлди. Натижада 16 йилдан бери мамлакатни бошқариб келаётган сиёсатчи бош вазирлик лавозимини тарк этади. У янги парламентда ўрин эгалламаслигини билдирди.

“Партия етакчиси сифатида олган мандатим ‘Фидес’га тегишли, шу сабабли уни қайтаришга қарор қилдим. Ҳозир мен парламентга эмас, миллий кучларни қайта ташкил этишга керакман”, деди Орбан.

У ҳозирда “Фидес” раҳбариятида фраксияни янгилаш бўйича муҳокамалар фаол давом этаётганини айтди. Фраксия 27 апрель куни шакллантирилади ва унга Гергелй Гуляс раҳбарлик қилади.

Венгриялик журналист Саболч Панининг маълумотига кўра, Орбан ёзда қизи ва куёви яшайдиган АҚШга боришни режалаштирмоқда.