Ўзбекистон халқ бахшиси Шоберди Болтаев 81 ёшида вафот этди

Ўзбек бахшичилик санъатини дунёга танитган атоқли санъаткорлардан бири Ўзбекистон халқ бахшиси Шоберди бахши Болтаев 81 ёшида вафот этди, деб хабар берди Сурхондарё вилояти ҳокимлиги.

Шоберди Болтаев 1944 йил Сурхондарё вилояти Бойсун туманининг Мунчоқ қишлоғида туғилган. Дастлаб 1965 йилда Мунчоқ қишлоғидаги «Нодира» номли 8 йиллик мактабда ўқитувчи бўлиб ишлаган. 1968 йил Термиз Давлат педагогика институти (ҳозирги ТерДУ)нинг педагогика факультетида таҳсил олган.

Таъкидланишича, Шоберди Болтаев терма, достон айтиш сирларини Хушбоқ бахши Мардонақуловдан ўрганган.

Унинг репертуарида «Алпомиш», «Олтин қовоқ», «Олланазар Олчинбек», «Кунтуғмиш», «Сулувхон», «Санам гавҳари», «Малла савдогар», «Ойпарча» каби достонлар, «Дўмбирам», «Мехмондир», «Тилар», «Нима керак», «Билмади», «Ойпари» каби термалар ўрин олган.

Шоберди бахши 1993 йил Ўзбекистон президентининг фахрий ёрлиғи, 2002 йил «Ўзбекистон халқ бахшиси» унвони, 2007 йил «Эл-юрт ҳурмати» ордени билан тақдирланган.

2002 йилда унинг «Ойпарча» номли термаси, 2019 йил «Малла савдогар» номли достони чоп этилган.

Шоберди Болтаев яқин-яқингача Сурхондарё вилояти Термиз шаҳридаги 22 сонли Болалар мусиқа, санъат ва бахшичилик мактабида фахрий директор вазифасида ишлаб, бир қатор ёш бахшиларга дўмбира чалиш ҳамда бахшичилик санъати сирларини ўргатиб келаётган эди.