Бугун 19 сентябрь, 2019 йил, пайшанба

O'ZB

Ўзбекистон энди Хитойга қовун ҳам экспорт қилади

Ўзбекистон энди Хитойга қовун ҳам экспорт қилади

Ўзбекистон Республикаси Бош вазири Абдулла Арипов 27-28 август кунлари Хитойга амалга оширган расмий ташрифи доирасида Ўзбекистон Республикаси Вазирлар Маҳкамаси ҳузуридаги Ўсимликлар карантини давлат инспекцияси ва Хитойнинг бош божхона бошқармаси ўртасида «Ўзбекистондан Хитойга қовун экспорт қилиш бўйича фитосанитар талаблар тўғрисида баённома» имзоланди. Бу ҳақда «Ўздавкарантин» инспекцияси ахборот хизмати хабар бермоқда.

«Ушбу баённомага мувофиқ, Ўзбекистондан Хитойга экспорт қилинадиган қовун Ўзбекистоннинг тўртта вилоятидан – Хоразм, Сирдарё, Жиззах ва Қашқадарё вилоятларидан бўлиши лозим. Шунингдек, Хитойга экспорт қилинадиган қовун фитосанитар талабларга тўлиқ мувофиқ келиши, жумладан, зарарли организмлардан ҳоли ҳудудларда етиштирилиб, карантин инспектори томонидан мониторинг назоратидан ўтказилган бўлиши талаб этилади.

Қовунни экспорт қиладиган барча далалар, қадоқлаш цехлари Хитой ва Ўзбекистон карантин хизматларининг биргаликдаги рўйхатидан ўтказилиши ва тасдиқланиши лозим. Ушбу рўйхатдан жой олишни режалаштираётган тадбиркорлик субъектларидан 10 сентябрга қадар ‘Ўздавкарантин’ инспекциясига мурожаат қилишлари сўралади.

Шуни алоҳида таъкидлаш керакки, қовунни экспорт учун юклаш ва ташиш «Ўздавкарантин» инспекциясининг ҳудудлардаги инспекторлари назорати остида амалга оширилиши белгиланган. Экспорт қилинаётган маҳсулот қадоғида дала ва қадоқлаш цехи ҳақидаги тўлиқ маълумотлар кўрсатилиши талаб қилинади.

Хитой томонидан қовун экспортига қўйилаётган талабларнинг тўлиқ матни билан ушбу ҳавола орқали танишишингиз мумкин.

Юқоридаги талабларга риоя этилмаган ҳолда, юкланиб экспортга йўналтирилган қовун чегара масканларидан қайтарилишига сабаб бўлиши мумкин.

Эслатиб ўтамиз, ҳозирда Хитойга Ўзбекистондан экспорт қилишга рухсат этилган карантин остидаги маҳсулотлар тури 12 та (гилос, мош, қобиқсиз грек ёнғоғи, ширин ва аччиқ бодом, узум данаклари, кунжут, майиз, қуритилган аччиқ қалампир, аччиқ қалампир, ўрик қоқиси, қовун)ни ташкил этади.

Экспортёр тадбиркорлар юқорида кўрсатилган маҳсулотларни транспорт бирликларига юклашдан олдин “Ўздавкарантин” инспекциясининг ҳудудлардаги инспекторларига мурожаат этишлари лозим.

Ҳозирда “Ўздавкарантин” инспекцияси ХХР карантин хизмати билан Хитойга қўшимча равишда анор, узум ва лимон экспорт қилинишига рухсат олиш бўйича музокаралар олиб бормоқда», — дейилади хабарда.

 

Киритилди: 17:02 01.09.2019. Ўқилди: 626 марта. Фикрлар сони: 0 та.
telegram channel

Бўлимга тегишли қизиқарли хабарлар

Энг кўп ўқилган янгиликлар

Фикр билдириш учун қайдномадан ўтишингиз сўралади, ва телефон ракамни тасдиклаш керак булади!