Ўқувчиларни академик лицейларга қабул қилишнинг янги тартиби қабул қилинди

Вазирлар Маҳкамасининг “Ўқувчиларни академик лицейларга қабул қилиш, уларнинг ўқишини кўчириш, қайта тиклаш ва ўқишдан четлатиш тартибини такомиллаштириш чора-тадбирлари тўғрисида”ги 320-сонли қарори билан янги низом жорий этилди. Ушбу тартиблар академик лицейларга кириш жараёнини янада самарали ва шаффоф қилишга қаратилган.

Академик лицейларга қабул жараёни:

Рўйхатдан ўтиш

Рўйхатдан ўтказиш платформаси:

Академик лицейларга ҳужжат топширувчилар Ягона интерактив давлат хизматлари портали ва Олий таълим, фан ва инновациялар вазирлигининг расмий веб-сайти орқали рўйхатдан ўтказилади.
Рўйхатдан ўтиш жараёни ҳар йили 10-июндан 10-июлга қадар my.edu.uz платформаси орқали бепул амалга оширилади.
Йўналиш танлаш:

Абитуриентларга рўйхатдан ўтишда учтагача академик лицейнинг таълим тили бир хил бўлган йўналишлардан биттасини танлаш имконияти берилади.
Тест синовлари
Кириш тест синовлари:
Абитуриент ўз танлаган ҳудудда, яъни Қорақалпоғистон Республикаси, вилоятлар маркази ёки Тошкент шаҳрида ташкил этиладиган кириш тест синовларида иштирок этади.
Олий таълим, фан ва инновациялар вазирлигининг вазифалари
Қабул параметрлари тасдиқланиши:

Ҳар йили 1-июнга қадар, Олий таълим, фан ва инновациялар вазирлиги томонидан Иқтисодиёт ва молия вазирлиги билан келишилган ҳолда, академик лицейларга қабул параметрлари тасдиқланади.
Тест синовлари учун фанлар мажмуаси:

Ҳар йили 1-ноябрга қадар, Олий таълим, фан ва инновациялар вазирлиги навбатдаги ўқув йили учун академик лицейларнинг таълим йўналишларига мос тест синови топшириладиган фанлар мажмуаси, тест топшириқлари сони, баҳолаш мезонлари ва мантиқий фикрлаш даражасини (ИҚ) аниқлаш бўйича тест учун тайёрланиши лозим бўлган адабиётлар рўйхатини тасдиқлайди.