Украинанинг собиқ мудофаа вазири Михаил Фёдоров уруш шароитида президентлик сайловларини ўтказишга чақирди

Фёдоров ҳатто давом этаётган уруш шароитида ҳам тўлақонли демократик жараённи қайта тиклаш имконини берадиган “қонуний, хавфсиз ва реал механизм”ни топиш кераклигини айтди. "Агар уруш яна бир, икки ёки уч йил давом этса, Россия украинларнинг ўз ҳукуматини қачон сайлашини ҳал қиладиган кучга айланиб қолиши керакми? Менимча, йўқ. Демократия Россияга асир бўлиб қолмаслиги керак. Биз айнан эркин Европа давлати бўлиб қолишни истаганимиз учун курашмоқдамиз", — деди у. Фёдоровнинг сўзларига кўра, сайлов ўтказиш мураккаб кечади, чунки ҳарбийлар, хориждаги миллионлаб украиналиклар ва фронтолди ҳудудларида яшаётган аҳолининг овоз бериш ҳуқуқини таъминлаш зарур. Бироқ бу мураккаблик “имконсиз” эканини англатмайди. "Украина дунё имконсиз деб ҳисоблаган ишларни аллақачон кўп марта бажарган. Биз бу вазиятда ҳам ечим топишимиз мумкин, чунки демократия тинчлик давридаги ҳашамат эмас, демократия бугун биз курашаётган нарсанинг бир қисмидир", — деди Украинанинг собиқ мудофаа вазири. Фёдоров 2026 йил январидан буён Украина мудофаа вазири лавозимида ишлаб келаётган эди. Июл ойида президент Володимир Зеленский уни ишдан бўшатди. Бунга Украина Қуролли кучлари бош қўмондони Олександр Сирский билан зиддият сабаб бўлгани маълум қилинди. Фёдоровнинг истеъфоси туфайли кўчаларда норозилик намойишлари бўлиб ўтди. Кўп ўтмай, Сирский ҳам ўз лавозимидан бўшатилди.