Украина ва Россия навбатдаги ҳарбий асирлар алмашинуви ўтказилганини эълон қилди

Россия Мудофаа вазирлиги яна бир гуруҳ россиялик ҳарбий хизматчилар юртига қайтарилганини маълум қилди. Қайд этилишича, бунинг эвазига Украинага ҳарбий асирларидан иборат гуруҳ топширилди.

Украина президенти Володимир Зеленский 26 июн куни мамлакатга Украина Қуролли кучлари, Миллий Гвардия ва Давлат чегара хизмати ҳарбийлари қайтарилганини билдирди. Зеленскийнинг сўзларига кўра, уларнинг аксарияти 2022 йилдан бери асирликда бўлган.

Киев ва Москва алмашинувда томонлар бир-бирига нечта асирни топширганига аниқлик киритмади.