"Украина — Путиннинг босқинчилик режаларининг фақат бошланиши"

Германия канцлери Фридрих Мерцнинг фикрича, Россия президенти Владимир Путиннинг “империалистик режаси” Украинани босиб олиш билан тугамайди.

"Биз ҳар куни Россиянинг тобора кучайиб бораётган гибрид ҳужумларига, жумладан, инфратузилмамизга қаратилган хуружларига дуч келмоқдамиз. Москва қоидалар асосидаги тартибни ҳамда Европадаги тинчлик архитектурасини бузди. Ҳозирда Германия олдида янги хавфсизлик архитектурасини яратиш каби тарихий вазифалар турибди. Бу тизим бир неча ўн йиллар давомида барқарор ишлаши лозим", — дея таъкидлади канцлер.

"Биз “либерал жаҳон тартиби” деб атайдиган тамойил бугун кўплаб йўналишларда, жумладан, Ғарб ичида ҳам сиёсий босим остида қолмоқда" — деди Мерц.

Шунингдек, у яқин йилларда Германиянинг АҚШ ва Хитой билан муносабатлари ўзгаришини айтди. "АҚШ ўз манфаатларини қайта кўриб чиқмоқда, бу жараён сўнгги кунларда эмас, анча олдин бошланган. Биз Европада ҳам ўз манфаатларимизни қайта кўриб чиқишимиз зарур", — деди Германия ҳукумати раҳбари.

Бундан ташқари, Мерц янги савдо тизимини яратиш, хомашё ва савдо занжирларини диверсификация қилиш зарурлигини таъкидлади. Хитой билан муносабатларда эса у хавфсизликка янада кўпроқ йўналтирилган сиёсат юритишга чақирди.