Украина 2027 йилда Евроиттифоққа аъзо бўладими?

Брюссель ва Вашингтон Киевни тезлаштирилган тартибда қабул қилишга тайёрланаётгани ҳақида ОАВ ёзмоқда.

АҚШ ва унинг иттифоқчилари Украина учун янги тинчлик формуласи устида ишламоқда. The Washington Post манбаларига кўра, мазкур формула доирасида энг асосий бандлардан бири — Украинанинг 2027 йилда Евроиттифоққа кириши бўлиши мумкин.

Манбаларнинг айтишича, пакет уч ҳужжатдан иборат:

• тинчлик келишуви,

• хавфсизлик кафолатлари,

• Украина иқтисодиётини тиклаш режаси.

Киев ва ЕИ ўз таклифларини тайёрлаган ва уларни 10 декабрь куни тақдим этишни режалаштирмоқда. Бироқ улар оммага эълон қилинадими — бу ҳали аниқ эмас. Аввалроқ АҚШ Киевнинг тинчлик режаси тафсилотларини ошкор қилганидан норози бўлган эди.

Оқ уй Украина Евроиттифоққа қўшилиши савдо-сотиқни жонлантириши, инвестицияларни жалб қилиши ва коррупцияга қарши курашни кучайтиришга ёрдам беришини таъкидламоқда. Дональд Трамп маъмурияти Венгриянинг қаршилигини енгиб ўтиш мумкинлигига ишонмоқда, ҳолбуки айнан Будапешт Украинанинг аъзолигига энг кескин қарши томон ҳисобланади.

Россия эса Киевнинг танлови — унинг суверен ҳуқуқи эканини таъкидлаб келади. Москва Украинанинг ЕИга киришига қарши эмаслигини айтади, бироқ НАТОга аъзолик истиқболига қатъий қаршилик билдирмоқда. Шу билан бирга, Кремль ҳудудий имтиёзлар талаби билан чиқишни давом эттирмоқда. Москва фикрича, Украина шарқидаги айрим ҳудудлар “барибир Россия таркибига киради”.

Тинчлик бўйича музокаралар эса ниҳоятда мураккаб кечаётгани қайд этилмоқда. Financial Timesнинг ёзишича, Трамп Украинанинг ҳозирги президенти Владимир Зеленскийга “бир неча кун” ичида жавоб беришни талаб қилган, келишувни католик Рождествосигача имзолашни истаган.

Жараёндаги асосий интригалардан бири — Венгрия позицияси. Бош вазир Виктор Орбан Украинанинг аъзолигига очиқчасига қарши чиқиб, бу ЕИни урушга тортиши ва тикланиш учун улкан харажатлар талаб қилиниши мумкинлигини таъкидлайди. Унинг фикрича, давом этаётган можаро ва ноаниқ чегара масалалари Евроиттифоқни заифлаштириши мумкин.

Шу билан бирга, Будапешт Балқан мамлакатлари, шунингдек Молдова ва Грузиянинг ЕИга қўшилишини фаол қўллаб-қувватламоқда — ҳеч қандай олдинги шартларсиз.