Уиткофф Берлинда Европа етакчилари ва Зеленский билан учрашади

АҚШ президентининг элчиси Стивен Уиткофф шу ҳафта охирида Берлинда Европа етакчилари ва Украина президенти Владимир Зеленский билан учрашади.

Бу ҳақда The Wall Street Journal манбаларига таяниб хабар бермоқда.

Манбаларга кўра, у 14-15 декабрь кунлари Буюк Британия, Германия ва Франция музокарачилари билан учрашади. Уиткоффни Берлинга жўнатиш қарори АҚШ маъмуриятининг Вашингтон ва Киев ўртасидаги тинчлик битими шартлари бўйича келишмовчиликларни бартараф этишга содиқлигини кўрсатади, деб ҳисоблайди газета.

Берлин музокараларида Франция президенти Эммануэль Макрон, Буюк Британия бош вазири Кир Стармер ва Германия канцлери Фридрих Мерц ўз маслаҳатчилари билан бирга иштирок этиши кутилмоқда, деб ёзади The Wall Street Journal. Аввалига Европа етакчилари шу дам олиш кунлари Трамп билан АҚШ тинчлик режаси бўйича ўз таклифларини муҳокама қилиш учун учрашув ташкил қилмоқчи эди, дея эслайди газета.

Трамп аввалроқ Вашингтон бу музокаралар самарали бўлишини тушунсагина, АҚШ Европадаги учрашувга ўз вакилини юборишини айтган эди.