Туркияда «Росатом»нинг АЭС қурилиши учун пуллари хатловга олинди

Россиянинг «Росатом» корпорацияси энг йирик Россия-Туркия инвестицион лойиҳаси — «Аққую» АЭСини қуриш учун ўтказиб берган пуллар хатловга олинган, деган корпорация раҳбари Алексей Лихачёв «Россия 1» телеканалига берган интервюсида.

Туркияда «Росатом»нинг АЭС қурилиши учун пуллари хатловга олинди

calendar

19:10

4871

Россиянинг «Росатом» корпорацияси энг йирик Россия-Туркия инвестицион лойиҳаси — «Аққую» АЭСини қуриш учун ўтказиб берган пуллар хатловга олинган, деган корпорация раҳбари Алексей Лихачёв «Россия 1» телеканалига берган интервюсида.

«Аққую» атом электр станцияси. Фото: TRT Haber

«Ўзаро ҳисоб-китоб тизими зарба остида. Улар пулларни хатловга олиб, музлатиб қўйишмоқда», — дея шикоят қилган Лихачёв «Москва. Кремл. Путин» дастури эфирида.

Топ-менежернинг сўзларига кўра, пулларнинг хатловга олинишига «Росатом» билан билан ишловчи «юридик шахслар ва банклар ўртасида зир қатнаб юрган америкаликлар» сабабчи.

Туркияда 25 млрд долларга баҳоланган ва тўлиқ Россия томонидан молиялаштириладиган АЭС лойиҳасини амалга оширишга санкциялар халақит бермоқда, деган Лихачёв. Гарчи «Росатом»нинг ўзи ғарб давлатларининг чеклов чоралари остига тушмаган бўлса-да, унинг бир нечта шуъба корхоналари санкция рўйхатларига киритилган. Уларнинг орасида ядровий қурилмаларни монтаж технологиясини ишлаб чиқувчи «Атомстрой» АЖ ва уранни бойитиш учун центрифугалар ишлаб чиқарувчи «Точмаш» ишлаб чиқариш бирлашмаси бор.

Лихачёвнинг сўзларига кўра, санкциялар ва қийинчиликларга қарамасдан, «Росатом» Туркияда илк ишга тушириладиган ва режага кўра 12 млн истеъмолчини ток билан таъминлайдиган АЭС қурилишини давом эттиради.

Туркия ва Россия ўртасида «Аққую» АЭСини қуриш ва фойдаланишга топшириш бўйича ҳукуматлараро битим 2010 йилда имзоланган эди. Ўтган йили тўртта энегоблокдан биринчисининг тантанали очилиш маросими бўлди. АЭС тўлиқ ишга туширишгач, лойиҳавий қувват Туркиянинг электр энергиясига бўлган талабининг 10 фоизини қондиради. АЭСнинг физик ишга туширилиши жорий йилга мўлжалланган.

Москва ушбу лойиҳани ўзининг «суверен фондлари» эвазига молиялаштирмоқда, деган эди Владимир Путин июн ойида ўтган фан ва тадим бўйича кенгаш йиғилишида. «Буларнинг барчаси Россия ҳисобидан», — деган эди Путин, бундай даражадаги давлат молиялаштириши «иқтисодий жиҳатдан мақсадга мувофиқлиги»га урғу бериб.

«Аққую»дан ташқари Туркия ҳокимияти яна учта АЭС қурмоқчи, шунингдек, кичик модул реакторларни харид қилмоқчи. «Росатом»дан ташқари Туркия энергетика вазирлиги америкалик пудратчилар, шунингдек, Хитой ва Жанубий Корея компаниялари билан музокаралар олиб бормоқда, дея хабар берган Reuters вазирликнинг юқори мартабали мулозимига асосланиб.