Трамп: "Хитой билан савдо битими Канада учун ҳалокатли бўлади"

АҚШ президенти Дональд Трамп Хитой билан савдо битими Канада учун ҳалокатли бўлишига ишонч билдирди.

Бу ҳақда Америка етакчиси Truth Social ижтимоий тармоғида ёзди.

"Канада ўзини мунтазам равишда йўқ қилмоқда", дейилади постда. "Хитой билан битим Канада учун ҳалокатдир. Бу тарихдаги энг ёмон битимлардан бири сифатида эсда қолади."

"Уларнинг барча бизнеслари АҚШга кўчиб ўтмоқда", деб қўшимча қилди Трамп Канада компанияларига ишора қилиб.

"Мен Канаданинг омон қолишини ва гуллаб-яшнашини истайман", деб ишонтирди АҚШ президенти. Шунингдек, у Канада автомобиль саноати вакилларининг нутқи видеосини жойлаштирди ва кўришни тавсия қилди, унда улар, бошқа нарсалар қатори, АҚШ билан савдо алоқаларини сақлаб қолиш муҳимлигини таъкидладилар.

Бошқа бир постда Трамп "Хитой бир вақтлар буюк бўлган Канадани муваффақиятли ва тўлиқ эгаллаб олмоқда" деб даъво қилди.

"Кўриш жуда ачинарли. Умид қиламанки, улар хоккейга тегмайдилар", деб қўшимча қилди АҚШ президенти.