Трамп Венесуэла нефт саноатига сармоя киритадими?

Трамп Венесуэла нефт саноатига сармоя киритишни истамоқда, нефт компаниялари эса бунга шубҳа билан қарамоқда.

АҚШ президенти Доналд Трамп жума куни мамлакатдаги энг йирик нефт компаниялари раҳбарларини Венесуэла нефт саноатига сармоя киритишга чақирди. Бу чақириқ Қўшма Штатлар томонидан Венесуэла президенти Николас Мадуронинг қўлга олинишидан бир ҳафта ўтиб янгради.

Трамп АҚШ нефт компаниялари Венесуэлага камида 100 миллиард доллар сармоя киритишини истамоқда, бироқ компаниялар ҳозирча президент ташаббусига эҳтиёткорлик билан ёндашмоқда.

Оқ уйда бўлиб ўтган учрашувда Exxon Mobil, ConocoPhillips, Chevron, Halliburton ва бошқа энергетика компаниялари раҳбарлари иштирок этди.

"Жиддий ўзгаришлар ва кенг кўламли ислоҳотларсиз Венесуэлага сармоя киритишнинг иложи йўқ", — деди Exxon Mobil бош директори Даррен Вудс.