Трамп сиёсати Лотин Америкасидаги АҚШ таъсирини заифлаштириши мумкин

АҚШ президенти Дональд Трампнинг Канада ва Лотин Америкаси мамлакатларига нисбатан босим ва таҳдид сиёсати Американинг минтақадаги таъсирининг пасайишига олиб келиши мумкин.

Бу фикр Foreign Affairs журналидаги мақолада билдирилган.

Бразилия университети Жетулиу Варгаса жамғармаси қошидаги Халқаро муносабатларни ўрганиш маркази раҳбари Матиас Спекторнинг фикрича, Трампнинг тактикаси ҳамкорларнинг қисқа муддатли ён беришларига олиб келиши мумкин, аммо Вашингтоннинг узоқ муддатли етакчилигини таъминлай олмайди.

"Трамп кўп нарсани талаб қилади, лекин бунинг эвазига кам таклиф қилади. Унинг таҳдидлари ва қўрқитишлари барқарор етакчилик учун асос бўла олмайди", - дея қайд этади эксперт.

Мақолада қайд этилишича, Лотин Америкасининг бир қатор давлатлари аллақачон Хитой билан иқтисодий алоқаларни ривожлантиришга киришиб, АҚШ билан анъанавий муносабатларни заифлаштирган. Хусусан, Канада Европа Иттифоқи ва Осиё мамлакатлари билан савдо ҳамкорлигини кенгайтирса, Аргентина ва Бразилия Пекин билан алоқаларни мустаҳкамламоқда.

Аввалроқ Вашингтон Канада ва Мексикадан импорт қилинадиган маҳсулотларга 25 фоизлик божлар жорий қилган, шунингдек, Хитой товарларига божларни 10 фоиздан 20 фоизга оширган эди. Трамп, шунингдек, янги тарифларни 2 апрелгача вақтинча кечиктириш тўғрисидаги буйруқни имзолади ва бундан кейин ҳеч қандай енгиллик бўлмаслигини таъкидлади.

Трамп, шунингдек, Канада, Гренландия ва Панама каналини ўз ичига олган ҳолда мамлакат чегараларини кенгайтириш ниятида эканлигини маълум қилди. Унинг фикрича, Канаданинг АҚШга кириши ўз фуқаролари манфаатларига мос келади ва Панама канали Хитой таъсиридан халос бўлиши керак.