Трамп келишувга тайёр...

Трамп келишувга тайёрлигини билдирди.

АҚШ президенти ҳарбий сценарийдан кўра дипломатик ечимни афзал кўриши ва Теҳрон билан музокаралар давом этаётганини тасдиқлади.

АҚШ президенти Дональд Трамп Эрон билан келишувга эришишга ҳали ҳам умид қилаётганини ва эҳтимолий ҳарбий можародан кўра дипломатик йўл билан ечим топишни афзал кўришини билдирди. Бу ҳақда у Лас-Вегас шаҳрида тарафдорлари олдида сўзлаган нутқида маълум қилди.

Трампнинг сўзларига кўра, Вашингтон Теҳрон билан музокараларни давом эттирмоқда ва уларнинг натижалари яқин вақт ичида маълум бўлиши мумкин.

«Биз музокаралар олиб бораяпмиз. Кейин нима бўлишини кўрамиз. Аммо улар бизга ҳурмат билан муносабатда бўлмоқда», — деди АҚШ раҳбари.

Трамп, шунингдек, «одамларни ўлдиришни истамаслиги» сабабли келишув тузишни афзал кўришини таъкидлади. Шу билан бирга, унинг айтишича, АҚШ Эронга Иккинчи жаҳон урушидан бери энг йирик зарбани беришга тайёр бўлган, аммо Теҳрон музокараларни бошлаш таклифини билдирганидан сўнг бу режадан воз кечилган.

АҚШ президенти яна бир бор Эрон ядровий қуролга эга бўлмаслиги кераклигини таъкидлади.

Аввалроқ Трамп бўлажак музокараларни Эрон учун «сўнгги имконият» деб атаб, келишувга эришилмаган тақдирда АҚШнинг ҳарбий босими янада кучайтирилишини айтган эди.

Шунингдек, у Ормуз бўғози халқаро кемалар қатнови учун қайта очилмаса, Теҳронга нисбатан янги зарбалар берилиши мумкинлигидан ҳам огоҳлантирган.