Трамп: "Эрон иқтисодиётининг ёмонлашиб бораётгани Теҳронни келишувларга эришишга ундайди"

АҚШ президенти Дональд Трамп Эрондаги иқтисодий вазият ёмонлашиб бораётганини айтди ва Теҳрон билан келишувга эришишга ишонч билдирди.

Трамп бу ҳақда Axios нашрига берган интервьюсида айтиб ўтди.

"Биз жимгина ҳаракат қиляпмиз", деди Трамп Вашингтоннинг Эронга оид кейинги қадамларини муҳокама қилар экан.

Америка етакчисининг сўзларига кўра, АҚШ Теҳрон билан қисман музокаралар олиб бормоқда ва ҳозирда Эрондаги вазиятни кузатиб бормоқда, у ерда юқори инфляция ва маблағ етишмаслигини баҳоламоқда.

Трамп Эроннинг иқтисодий жиҳатдан "жуда ёмон аҳволда" эканлигини таъкидлади. Унинг фикрича, бунинг сабабларидан бири АҚШнинг Эронга қарши денгиз блокадаси.

Axiosнинг АҚШ расмийларига таяниб хабар беришича, бир ҳафта олдин Трамп Эронга қарши кенг кўламли ҳарбий ҳаракатларни қайта бошлашга мойил бўлган, аммо кейинчалик уни вазиятни юмшатишга кўндиришган.

"Ҳамма нарса яхши бўлади. Ҳамма нарса доим яхши бўлади. Бу шахмат ўйинига ўхшайди", деди Трамп Эрон билан келишувга эришиш истиқболларини баҳолаб.