Америка Президенти Дональд Трамп чоршанба куни Ироққа ташрифи чоғида АҚШ бундан кейин дунёга миршаб бўлмаслигини маълум қилди.
Унинг сўзларини NBC телеканали келтиради. Барча ташвиш Қўшма Штатлар зиммасида эканлиги адолатдан эмас. Биз (АҚШ қўшинлари назарда тутилмоқда) жаҳон бўйлаб жойлашганмиз. Шундай мамлакатларда ҳам бормизки, кўпчилик ўша давлатлар ҳақида эшитмаган ҳам. Рост гап, бу бемаънилик деган Трамп.
ТАССнинг аниқлик киритишича, Трамп рафиқаси ҳамроҳлигида эълон қилинмаган ташриф билан Бағдоддан жанубда жойлашган Айн ал-Асад ҳарбий ҳаво кучлари базасида бўлиб, америкалик ҳарбийлар билан қисқа суҳбат олиб борган. АҚШ Президенти шунингдек, Американинг Ироқдаги элчиси билан учрашган.
Эслатиб ўтамиз, 19 декабрда Америка етакчиси Суриядан АҚШ қўшинлари чиқарилишини эълон қилган эди.
Manba: ЎзА
