Бухоро вилояти божхона бошқармасининг “Олот” чегара божхона пости орқали катта миқдордаги ноқонуний товарларни олиб киришга бўлган уриниш бартараф этилди.
Унда хорижий йўналиш бўйлаб ҳаракатланган юк автомашинаси “Олот” чегара божхона постига кириб келган чоғида тегишли божхона назоратидан ўтказилди.
Инспекцион кўрик мажмуасининг рентген тасвирлари ва божхона юк декларациясида ўзаро тафовут юзага келганлиги туфайли холислар иштирокида машина божхона кўригидан ўтказилди.
Натижада эса машинада ҳеч қандай тегишли ҳужжатларда қайд этилмаган, умумий қиймати 945 миллион сўмни ташкил этувчи “Calgon” номли кир ювиш воситалари борлиги аниқланди.
Айни дамда ҳолат юзасидан божхона органлари томонидан терговга қадар суриштирув ҳаракатлари олиб борилаётганлиги сабабли, мазкур товарларга нисбатан қонуний қарор қабул қилингунга қадар вақтинча сақлов чоралари қўлланилган.
