Тошкентдаги МЧЖ 1 миллиард 352 миллион сўмлик электр энергиясидан ноқонуний фойдаланган

Бу ҳақда «Ўзэнергоинспекция» ахборот хизмати маълум қилди. Унга кўра, Яшнобод туманида жойлашган кўп қаватли турар-жой мажмуасини электр энергияси билан таъминловчи “А.Б.” МЧЖнинг ноқонуний ҳолати ошкор этилди.

Маълум бўлишича, МЧЖ тасарруфидаги электр қурилмалар электр ҳисоблагичсиз тўғридан-тўғри тармоққа уланган.

Назорат тадбирида мажмуа ҳудудидаги автотураргоҳда ҳужжатларсиз электромобилларни зарядлаш қурилмасини ўрнатиш ҳолати ҳам аниқланди.

Дастлабки ҳисоб-китобларга кўра, бу вазият туфайли давлат манфаатларига 1 миллиард 352 миллион сўм зарар етказилган.

Айни пайтда мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.