Тинтув, ушлаб туриш ва тергов видеога олиниши зарур — президент

 Ўзбекистонда тинтув ва тергов, ушлаб туриш жараёнлари видеотасвирга олиниши мажбурий бўлади. Бу ҳақда Шавкат Мирзиёев Конституция куни муносабати билан сўзлаган нутқида айтган 

"Ўтган йилларда тинтув жараёнини, олинган кўрсатмаларни ҳодиса содир бўлган жойда текшириш, тергов эксперименти каби процессуал ҳаракатларни видеотасвир орқали қайд этиш шартлиги қонуний асосда белгиланган эди", деган президент.

Давлат раҳбарининг айтишича, шахсни ушлаб туриш, унга процессуал ҳуқуқларини тушунтириш каби жараёнлар, агар у ҳимоячидан воз кечса, бу ҳолатни ҳам мажбурий тарзда видеотасвирга тушириш тартиби ўрнатилади.

Ушланган шахс махсус бинога олиб келинганидан кейин бу ҳақда унинг оила аъзолари дарҳол хабардор қилиниши керак. Президент буни суриштирувчи, терговчи ва бошқа ваколатли шахснинг мажбурияти сифатида қонунда аниқ белгилаб қўйишни таклиф этган.

"Бундан ташқари, шахсни ушлаб туриш ва унинг ҳуқуқини чеклайдиган бошқа процессуал мажбурлов чораларини қўллаш ҳолатларини ҳисобга олишнинг электрон тизимига ўтиш зарур. Бу жараёнда инсон омили иштирокини иложи борича камайтириш лозим", деган Мирзиёев.