Теҳрон Исроилнинг ядровий дастури бўйича қимматли ҳужжатларни қўлга киритди

Теҳрон Исроилнинг ядровий дастури бўйича қимматли ҳужжатларни қўлга киритди, деб даъво қилмоқда Эрон матбуоти.

“Эрон разведкаси сионистик режимга тегишли жуда кўп миқдордаги стратегик ва махфий маълумотлар ва ҳужжатларни қўлга киритди”, деб хабар бермоқда Isna ва Tasnim давлат оммавий ахборот воситалари ҳамда Ливаннинг Ҳизбуллоҳга алоқадор al-Mayadeen нашри. Разведка “ядровий режалар ва иншоотларга оид минглаб ҳужжатларни” ўз ичига олган.

Ислом инқилоби қўриқчилари корпусига алоқадор Тasnim агентлигига кўра, разведка маълумотлари Эрон учун разведка маълумотларини йиғишда гумон қилиниб, май ойида Исроил полицияси томонидан ҳибсга олинган 24 ёшли икки исроиллик Рой Мизраҳи ва Алмог Атиас томонидан тўпланган ва узатилган. Ҳисоботда айтилишича, Эрон оммавий ахборот воситалари шу пайтгача тўпланган разведка маълумотлари ҳажми ва уни хавфсиз узатиш зарурати туфайли сукут сақлаган.

Бироқ операция ҳақида ҳеч қандай далил ёки олинган ҳужжатлар тафсилотлари келтирилмаган, деб ёзади The Times of Israel. "Сўнгги йилларда Эрон разведка ходимлари оддий исроилликларни жосус сифатида ёллаш бўйича саъй-ҳаракатларни кучайтирди. Ўтган декабр ойида полиция Эрон фойдасига жосуслик қилган 30 га яқин исроилликни, асосан яҳудий фуқароларни ҳибсга олди", деб тушунтиради газета.