Таъкидланишича, жараён қонунга мувофиқ амалга ошириляпти.
Мамлакат Ахлоқ тузатиш ишлари департаменти аввалрок шартли озодликка чиқиш ҳуқуқига эга маҳкумлар рўйхатини тузган эди. Таиланд қонунчилигига кўра, мазкур обрўли маҳбус мазкур рўйхатга кириш учун белгиланган мезонга тўлиқ жавоб беради.Зеро, у 70 ёшдан ошган, турли касалликлардан азият чекмоқда ва жазо муддатининг учдан биридан кўпини ўтаган.
Ўзини-ўзи сургун этган 74 ёшли Чинават 2023 йил 22 августда 15 йиллик танаффусдан сўнг Таиландга қайтганди.
Олий суд жами саккиз йиллик қамоқ ҳукмининг айрим бандларини кучида қолдирди. 31 август куни собиқ бош вазир қиролликка афв этиш тўғрисида сўров юборди. Қирол Маха Важиралонгкорн (Рама Х) мамлакат тараққиётига қўшган ҳиссаси учун уни афв этди ва муддатни бир йилга ўзгартирди.
Чинават 2001-2006 йилларда ҳукуматга раҳбарлик қилган. У Нью-Йоркда БМТ Бош Ассамблеяси сессиясида иштирок этаётган пайт қуруқлик қўшини бош қўмондони Сонтх Буньяратглин бошчилигидаги бир гуруҳ ҳарбийлар давлат тўнтаришини амалга оширди. Ўшанда Бош вазир чет элда қолишга мажбур бўлган. 2008 йил судга бориш учун Таиландга қайтган сиёсатчи ҳибсга олинди, аммо гаров эвазига қўйиб юборилди ва яна мамлакатни тарк этди. Суд Чинаватни давлат ерларини сотиб олиш учун мансаб ваколатини суистеъмол қилгани учун сиртдан икки йиллик қамоққа ҳукм қилган.
2019 йил апрелдан буён унинг бўйнига солиқ тўлашдан бўйин товлаганлик, коррупция сингари бошқа турли хил айбловлар қўйилиб, қўшимча озодликдан маҳрум этиш жазолари белгиланган.
