Суриянинг иқтисодиёт вазири бутун дунё давлатларини республикани тиклашда ёрдам беришга чақирмоқда

Суриянинг янги ҳукуматидаги Иқтисодиёт вазири Нидал ал-Шаар халқаро ҳамжамиятни республикани тиклашда ёрдам беришга чақирди.

Вазирнинг нутқи Al Hadath телеканали томонидан намойиш этилган.

Ал-Шаарнинг сўзларига кўра, мамлакат ҳукумати энди иқтисодиётни янада мустаҳкам асосда тиклаш имкониятига эга. Улар ишлаб чиқаришни кучайтириш, кичик ва ўрта бизнесни қўллаб-қувватлаш, хорижий сармояларни жалб этишга эътибор қаратиш ниятида.

“Биз халқаро ҳамжамиятни аввалги тузум томонидан вайрон қилинган нарсаларни тиклаш жараёнига ҳисса қўшишга чақирамиз”, — деди вазир.

Унинг қўшимча қилишича, ҳукумат инвестиция муҳитини хавфсизроқ ва жозибадор қилиш учун республикада янги иш ўринлари яратиб, шаффофликни оширади.