Шаҳрисабз аэропорти фуқаро авиацияси парвозлари учун 21 йилдан сўнг ўз фаолиятини тиклади

Шаҳрисабз маҳаллий аэропорти 11 сентябр куни фуқаро авиациясининг парвозлари учун ўз фаолиятини тиклади.

Uzbekistan Airports хабарига кўра, Silk Avia авиакомпаниясининг Тошкентдан илк парвози маҳаллий вақт билан соат 13:10 да аэропортга бориб қўнди. Парвоз вақти 1 соат 30 дақиқани ташкил этди.

Самолёт сув аркаси билан, биринчи йўловчилар эса карнай-сурнай садолари остида тантанали равишда кутиб олинди. Аэропортга парвозлар деярли 21 йилдан сўнг қайта йўлга қўйилган. Шаҳрисабз аэропорти 2003 йилнинг ноябр ойида ёпилган эди.