Санду Молдова ва Руминиянинг бирлашиши тарафдори эканини билдирди

Майя Санду Молдова ва Руминиянинг бирлашиши тарафдори эканини билдирди.

"Агар референдум бўлиб ўтса Руминия билан бирлашиш учун овоз берган бўлардим", — деди Молдова президенти Британиянинг The Rest is Politics подкастига берган интервьюсида.

"Дунёда нималар бўлаётганига қаранг. Молдова каби кичик давлат учун демократик ва суверен мамлакат сифатида яшаб қолиш, албатта, Россияга қаршилик кўрсатиш тобора қийинлашмоқда", — дея фикр билдирди Майя Санду.

Шу билан бирга, Майя Санду сўнгги пайтларда Молдовада ўтказилган сўровномалар натижаларига кўра, мамлакат аҳолисининг аксарияти Руминия билан бирлашишни қўллаб-қувватламаётганини таъкидлади. У Молдованинг Европа Иттифоқига интеграциясини “янада реал мақсад” деб атади.

Молдовада тахминан 2,4 миллион аҳоли яшайди, улардан қарийб 1,5 миллион нафари Руминия паспортига ҳам эга. Сўнгги йилларда Молдовада Россия томонидан босим кучайгани, хусусан, Москва сентябр ойида бўлиб ўтган парламент сайловлари натижаларига таъсир ўтказишга урингани ҳақида айтилмоқда. Шунга қарамай, сайловларда Мая Санду томонидан асос солинган, Евроиттифоқ билан ҳамкорлик тарафдори бўлган “Ҳаракат ва бирдамлик” (PAS) партияси ғалаба қозонди.