Россияда Путиннинг рейтинги тобора пасаймоқда

Россиянинг етакчи социологик марказларидан бири бўлган “Общественное мнение” фонди (ФОМ) томонидан 15-17 май кунлари ўтказилган сўровнома натижаларига кўра, россияликларнинг 71 фоизи Владимир Путин президент сифатида “яхши ишлаяпти” деб ҳисоблайди. Бу охирги йилдаги энг паст кўрсаткичдир.

Респондентларнинг 14 фоизи Путиннинг фаолиятини “ёмонроқ” деб баҳолашини айтди, бу йил давомидаги энг юқори кўрсаткич.

ФОМ маълумотларига кўра, Путинга бўлган ишонч даражаси бир йил ичида иккинчи марта минимал даражага тушиб кетган, атиги 71 фоиз рос ияликлар президентга “кўпроқ ишониши”ни билдирган. Аввалги марта март ойи охирида шундай бўлган эди, бунгача эса ишонч даражаси 76 фоиздан юқори эди.

Сўровнома иштирокчиларининг 17 фоизи Путинга “кўпроқ ишонмаслигини” айтди, бу март ойи охиридан бери энг юқори кўрсаткичдир.

Шу билан бирга, Бутунроссия жамоатчилик фикрини ўрганиш маркази (ВЦИОМ) Путиннинг рейтинги кетма-кет иккинчи ҳафта ўсиб бораётганини қайд этмоқда, бу социологлар нафақат респондентларга қўнғироқ қилиб, балки Путинга бўлган муносабатни билиш учун уларнинг уйларига борганидан сўнг бошланган.

Етакчи социологик марказлар март ойи охиридан бери Путиннинг рейтинги пасайиб бораётганини қайд этди. Бу Telegram'нинг блокланиши ва минтақаларда мобил алоқанинг узилиши, шунингдек, нархларнинг ошиши ва россияликларнинг урушдан чарчаши фонида содир бўлмоқда.