Россия университетлари 2018 йилда 500 нафар суриялик абитуриентларни бюджет асосида ўқишга қабул қилади. Бу ҳақда журналист Вадим Зайчиков маълум қилди.
“Бир неча йил олдин суриялик абитуриентлар учун 200 та жой ажратилганди, ўтган йили эса бу кўрсаткич 455 тага етди. 2018 йилда эса 500 нафар суриялик абитуриентлар бюджет асосида ўқишга қабул қилинади. Айни пайтда Сурияда уруш ҳолати якунланган ва мамлакат иқтисодиётини тиклаш учун кадрлар керак. Биз юқоридаги абитуриентлардан 50 нафар филолог ва ўқитувчи тайёрлашни режалаштирганмиз. Улар Сурияга қайтишади ва рус тилини ўргатишади”, деди Зайчиков.
Маълумот учун, абитуриентлар икки босқичда саралаб олинади. Биринчи босқичда мактабни яхши баҳоларга битирган абитуриентлар танлаб олинади. Иккинчи босқичда эса улар суҳбат орқали саралаб олинади. Айни дамда 2060 нафар ариза тушган. Танлаб олинган талабалар Россиянинг чет эллик абитуриентларни қабул қилиш ҳуқуқига эга бўлган исталган университетда таҳсил олиш имконига эга бўлишади.
