Олаф Шолц бу ҳақда Дрезденда бўлиб ўтган Германия Социал-демократик партиясининг сайловолди тадбири чоғида маълум қилди.
"Бу масала бўйича кўплаб муҳокамалар бўлиб ўтди. Украина президенти ҳам, мен ҳам Россия навбатдаги тинчлик анжуманида иштирок этиши керак деб ҳисоблаймиз. Барчани тинчлик музокараларини қўллаб-қувватлашга чақираман, аммо бу Украинани таслим қилиш орқали бўлмаслиги керак. Путиннинг империалистик орзуси учун деярли 400 минг киши жонини берди, у муваффақиятга эриша олмаслиги керак", —дея фикр билдирди Шолц.
Шу билан бирга, Германия канцлерининг сўзларига кўра, НАТОнинг позицияси шундан иборатки, Украинадаги уруш Россия Федерацияси ва алянс ўртасидаги урушга айланмаслиги керак. Шолц Украинага ёрдам бериш бўйича ҳар бир қарор ҳар томонлама ўйлаб кўрилиши ва Киевнинг барча талаблари ҳам қондирмаслиги мумкинлигини билдирди.
Аввалроқ Украина президенти Володимир Зеленский навбатдаги тинчлик конференцияси режаси ноябргача ишлаб чиқилиши кераклигини айтган эди. Bloomberg агентлигининг ёзишича, Украина Доналд Трампнинг Оқ уйга қайтиши эҳтимоли туфайли уни 2024 йил ноябрида бўлиб ўтадиган АҚШ президентлик сайлови олдидан ўтказишга интилмоқда.
